لاہور (نیوز ڈیسک )پاکستان پیپلز پارٹی کے پنجاب اسمبلی میں پارلیمانی لیڈر سید حسن مرتضیٰ نے کہا ہے کہ حکومت ایک دفعہ پھر 12 روپے فی لیٹر پٹرول کی قیمت میں اضافہ کرنا چاہتی ہے جبکہ بجلی کی قیمت میں اضافے پر بھی غور کیا جا رہاہے۔تفصیلات کےمطابق پاکستان پیپلز پارٹی کےصوبائی ترجمان سید حسن مرتضیٰ نے کہا کوئی ایسا دن نہیں گزرتا جب اشیائے صرف کی قیمت میں اضافہ نہ کیا جاتا ہو،حکومت نے ایک سال میں مہنگائی میں اضافے کے علاوہ کوئی کام نہیں کیا،پٹرول کی قیمت میں اضافے سے ہر شے کی قیمت میں اضافہ ہوگا اور مہنگائی کی نئی لہر آئے گی ۔انہوں نے کہا حکومت پٹرول کی قیمت میں اضافے سے گریز کرے ،

اگر حکومت نے پٹرول میں اضافے کی کوشش کی تو بھرپور احتجاج کریں گے۔ انہوں نے کہا کہ عوام کو بجائے عوام سے بنیادی حقوق چھین رہی ہے ہے،عوام کے لیے ہے روح اور بدن کا رشتہ برقرار رکھنا مشکل ہو گیا ہے ،عمران نیازی عوام پر پٹرول بم گرانا بند کریں۔ دوسری جانب ایک خبر کے مطابق سعودی تنصیبات پر حملے کے بعد عالمی مارکیٹ میں تیل کی قیمتوں میں یکدم ہوشربا اضافہ ہوگیا، پیر کے روز خام تیل کی قیمتوں میں 19.5 فیصد تک کا ریکارڈ اضافہ ہوا جو 30 سال کے دوران ایک دن میں تیل کی قیمت میں یہ سب سے زیادہ اضافہ ہے، سعودی عرب کو اپنی تیل کی پیداوار کی مکمل صلاحیت حاصل کرنے میں دن نہیں بلکہ ہفتے لگیں گے۔سعودی عرب میں موجود دنیا کی سب سے بڑی آئل کمپنی آرامکو (سعودی امریکی آئل کمپنی) کی ابقیق اور خریص میں تیل کی تنصیبات کو ڈرون حملوں میں نشانہ بنایا گیا تھا جس کی ذمہ داری حوثی باغیوں نے قبول کرلی تھی۔اس حملے کے بعد سعودی کمپنی آرامکو کا کہنا تھا کہ تیل کی پیداوار میں کمی کی وجہ سے دنیا بھر میں تیل کی فراہمی میں 57 لاکھ بیرل یومیہ یا 5 فیصد تک متاثر ہوسکتی ہے۔گزشتہ روز ماہرین عندیہ دیا تھا کہ اس مقدار میں تیل کی پیداوار میں کمی کی وجہ سے طلب اور رسد میں فرق پیدا ہوجائے گا جو مجموعی طور پر تیل کی قیمتوں پر اثر انداز ہوسکتا ہے۔

تاہم غیر ملکی خبر رساں ادارے کے مطابق خام تیل کے بینچ مارک میں 19.5 فیصد تک اضافہ ہوگیا۔مذکورہ حملے سے قبل خام تیل کی قیمت 66.20 ڈالر فی بیرل تھی تاہم اس میں 5.98 ڈالر فی بیرل اضافہ ہوگیا جس کی وجہ سے عالمی منڈی میں اس کی نئی قیمت 71.95 ڈالر فی بیرل تک پہنچ گئی۔امریکی ویسٹ ٹیکساس انٹرمیڈیٹ (ڈبلیو ٹی آئی) کے مطابق خام تیل کی قیمت میں 15.5 فیصد تک اضافہ دیکھنے میں آیا ہے جو 22 جون 1998 کے بعد ایک دن میں ہونے ولا یہ سب سے بڑا اضافہ ہے۔سعودی عرب دنیا میں سب سے زیادہ تیل برآمد کرنے والا ملک ہے اور ان حملوں کی وجہ سے اس کی برآمدات بھی متاثر ہوئی ہیں، تاہم ریاض نے بحالی سے متعلق کوئی حتمی تاریخ نہیں دی۔اس معاملے سے آگاہ ذرائع نے بتایا کہ سعودی عرب کو اپنی تیل کی پیداوار کی مکمل صلاحیت حاصل کرنے میں دن نہیں بلکہ ہفتے لگیں گے۔سنگاپور کے ایک مارکیٹ تجزیہ نگار مارگریٹ ینگ کا کہنا تھا کہ سعودی عرب اور امریکا اس صورتحال سے کس طرح نکلیں گے پوری دنیا کی نگاہیں اسی پر مرکوز ہیں۔انہوں نے مزید کہا کہ اگر تیل کی قیمتوں میں اضافہ برقرار رہا تو تیل پر انحصار کرنے والے ایشیائی صنعتی ممالک چین، جاپان، بھارت، جنوبی کوریا اور فلپائن اس سے متاثر ہونا شروع ہوجائیں گے۔