لاہور: پاکستان کرکٹ بورڈ نے کرکٹر عمر اکمل اور ہیڈ کوچ مکی آرتھر کے تنازعے کی تحقیقات کے لیے کمیٹی تشکیل دے دی۔

Omar Akmal Mickey Orthur dispute: PCB forming inquiry committee

قومی کرکٹر عمر اکمل نے ہیڈ کوچ مکی آرتھر پر گالیاں دینے کے الزامات عائد کیے تھے تاہم مکی آرتھر نے الزامات کو مسترد کردیا تھا جب کہ پی سی بی نے عمر اکمل کو شوکاز نوٹس جاری کیا جس کا کرکٹر نے جواب جمع کرادیا ہے۔ جیونیوز کے مطابق پاکستان کرکٹ بورڈ نے معاملے کی تحقیقات کے لیے تین رکنی انکوائری کمیٹی تشکیل دے دی ہے، کمیٹی میں ڈائریکٹر کرکٹ ہارون رشید، ڈائریکٹر میڈیا امجد بھٹی اور جی ایم لیگل سلمان نصیر شامل ہیں۔

ذرائع کے مطابق عمر اکمل نے شوکاز نوٹس میں معاملے کی تحقیقات کے لیے کمیٹی بنانے کا مطالبہ کیا تھا ۔ کمیٹی منگل کے روز سے کام کا آغاز کرے گی اور اس معاملے کو جلد از جلد نمٹانے کی کوشش کی جائے گی۔ ذرائع کا کہنا ہےکہ تحقیقاتی کمیٹی تمام معاملات کا جائزہ لےگی اور عمر اکمل کی جانب سے ضابطہ اخلاق کی خلاف ورزی کو دیکھا جائے گا جب کہ دونوں فریقین کے بیانات بھی ریکارڈ کیے جائیں گے۔ ذرائع نے بتایا کہ کمیٹی واقعے کے وقت موجود لوگوں تک رسائی حاصل کرکے ان سے بھی معلومات لے گی۔ واضح رہے کہ عمر اکمل کے شوکاز نوٹس کے جواب میں پی سی بی ذرائع کا کہنا ہےکہ کرکٹر اپنے جواب سے کرکٹ بورڈ کو مطمئن نہیں کرسکے ہیں۔