پیرس 30 اگست:2019 پوری پاکستانی قوم کے ساتھ ساتھ فرانس میں مقیم پاکستانی و کشمیری برادری اور سفارت خانہ پاکستان برائے فرانس کے تمام اراکین نے ’کشمیر آور‘ کے موقع پر مقبوضہ جموں و کشمیر کے عوام کے ساتھ اظہار یکجہتی کیا۔اس موقع پرگفتگو کرتے ہوئے سفیر پاکستان جناب معین الحق نے کہا کہ مشکل کی اس گھڑی میں حکومت اور پاکستانی عوام اپنے کشمیری بہن بھائیوں کے ساتھ کاندھے سے کاندھا ملا کر کھڑے ہیں اور پاکستان اس مقصد کیلئے اپنی سیاسی، سفارتی اور اخلاقی مدد جاری رکھے گا۔ انہوں نے فرانس میں مقیم پاکستانیوں کو بتایا کہ وزیراعظم پاکستان، عمران خان نے عہد کیا ہے کہ وہ کشمیر کے سفیر کی حیثیت سے اپنا کردار ادا کریں گے اور تمام بین الاقوامی فورمز پر اس مقصد کے لئے اپنی آواز بلند کریں گے۔

سفیر پاکستان نے بین الاقوامی برادری بالخصوص اقوام متحدہ کی سلامتی کونسل کے مستقل اراکین سے مطالبہ کیا کہ وہ جموں و کشمیرمیں بھارت کی جانب سے کی جانے والی انسانی حقوق کی خلاف ورزیوں کا نوٹس لیں جو کہ اس وقت دنیا میں سب سے زیادہ فوج زدہ علاقہ بنا ہوا ہے اور کشمیر کے اس دیرینہ تنازعہ کو اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق حل کروانے میں اپنا بھرپورکردار ادا کریں۔