Kabir Khan

نئی دلی : بھارتی میڈیا میں پاکستان کے خلاف اشتعال انگیزی اور نفرت کوٹ کوٹ کر بھری ہوئی ہے اور پاکستان کے حق میں ذرا سی بات بھی انہیں برداشت نہیں، ایسا ہی کچھ ہوا بجرنگی بھائی جان کے ڈائریکٹر کبیر خان کے ساتھ اس وقت جب انہوں نے صرف اتنا کہا کہ پاکستان کو دہشت گرد کے طور پر پیش کرنا منفی سوچ کی عکاسی کرتا ہے، بس پھر کیا تھا ایک بھارتی صحافی ان پر برس پڑا اور اپنے اندر چھپی ہوئی نفرت کا اظہار کردیا۔

بھارتی میڈیا کے مطابق زبردست شہرت حاصل کرنے والی فلم بجرنگی بھائی جان کے ڈائریکٹر کبیر خان اپنی نئی آنے والی فلم فینٹم سے متعلق پریس کانفرنس میں اپنی فلموں میں نظریات کی وضاحت کر رہے تھے کہ ایک صحافی نے سوال کر ڈالا کہ بھارت میں بننے والی فملوں میں پاکستان کو دہشت گرد ملک کے روپ کے طور پر پیش کیا جا رہا ہے جس کا جواب دیتے ہوئے کبیر خان کا کہنا تھا کہ پاکستان کو دہشت گرد ملک کے طور پر پیش کرنا منفی سوچ کی عکاسی کرتا ہے، ان کی دونوں فلمیں بجرنگی بھائی جان اور فینٹم کا مقصد پاکستان کو چوٹ پہنچانا نہیں بلکہ دونوں ملکوں کے عوام کے درمیان دوستانہ تعلقات کو فروغ دینا ہے۔

ایک سوال کے جواب میں کبیرخان کا کہنا تھا کہ لوگوں نے دہشت گردوں سے متعلق ایک ذہن بنالیا ہے کہ جو بھی اینٹی بھارت کوئی کام کرے گا وہ دہشت گردہے اور اس کا تعلق پاکستان سے ہے لیکن ایسا نہیں ہے اور یہی وہ نقطہ ہے جو انہوں نے فلم بجرنگی بھائی جان میں پیش کیا ہے۔ کبیر خان نے جیسے ان خیالات کا اظہار کیا تو وہاں موجود ایک صحافی آگ بگولہ ہوگیا اور فلم ڈائریکٹر کبیر خان پر غصہ نکلاتے ہوئے پاکستان سے اپنی روایتی دشمنی اظہار کردیا۔