Panama UN

وزارت قانون کی جانب سے تجاویز وزیراعظم سیکرٹریٹ کو ارسال کر دی گئیں ، حتمی فیصلہ وزیر اعظم کریں گے
اسلام آباد (یس اُردو) پاناما لیکس کی تحقیقات جوڈیشل کے بجائے انکوائری کمیشن کرے گا ، وزارت قانون نے تجاویز وزیر اعظم سیکرٹریٹ کو بھجوا دیں ، حتمی فیصلہ وزیر اعظم کریں گے ۔ پاناما لیکس پر تحقیقات کیسے ہوں ، قواعد و ضوابط کیا ہوں گے ، وزارت قانون نے سر جوڑے ، اجلاس میں وزیر قانون ، زاہد حامد اور قانونی ماہرین شریک ہوئے ۔ اجلاس میں وزیر اعظم کی ہدایت کے مطابق تحقیقات کیلئے کمیشن کے قیام سے متعلق امور پر غور کیاگیا ۔ کمیشن کے لیے قواعد و ضوابط سمیت اہم معاملات پر مشاورت بھی کی گئی ۔ کمیشن کے قیام کے لیے ریٹائرڈ ججوں کے ناموں کا بھی جائزہ لیا گیا جس کے بعد وزارت قانون نے تجاویز وزیر اعظم سیکرٹریٹ کو بھجوا دیں ۔ کمیشن کی تشکیل کے حوالہ سے حتمی فیصلہ وزیر اعظم کریں گے ۔ وزیر اعظم نے اپنے خطاب میں پانامہ لیکس کی تحقیقات کیلئے جوڈیشل کمیشن بنانے کا کہا تاہم وزارت قانون کے ذرائع کے مطابق پاناما لیکس کی تحقیقات جوڈیشل کے بجائے انکوائری کمیشن کرے گا ۔ مجوزہ کمیشن کمیشن آف انکوائریز ایکٹ 1956 ء کے تحت وزارت قانون قائم کرے گی ۔ ذرائع کے مطابق انکوائری کمیشن کے سربراہ اور ارکان کے معاملے پر وزیر اعظم سیکرٹریٹ میں مشاورت بھی ہوئی ۔