ممبئی: بالی ووڈ کی خوبرو اداکارہ پرینیتی چوپڑا کو سمندر کی لہروں سے کھیلنا مہنگا پڑگیا ہے۔

فلم عشق زادے سے بالی ووڈ میں اپنی پہچان بنانے والی چلبلی اداکارہ پرینیتی چوپڑا کا شمار بھارتی فلم انڈسٹری کی خوبصورت اور باصلاحیت اداکاراؤں میں ہوتا ہے، پرینیتی کو اداکاری کے علاوہ گھومنے پھرنے کا بھی بے حد شوق ہے تاہم ان کا یہ شوق مہنگا پڑگیا اور سمندر میں سرف بورڈنگ کرتے ہوئے پرینیتی چوپڑا اپنی ٹانگ زخمی کروابیٹھیں۔ اداکارہ پرینیتی چوپڑا ان دنوں آسٹریلیا میں چھٹیوں کے مزے لے رہی ہیں اور آسٹریلیا میں گزارے گئے بہترین دنوں کو مداحوں کے ساتھ سوشل میڈیا پر شیئر بھی کررہی ہیں، حال ہی میں پرینیتی چوپڑا نے ٹوئٹر پر اپنی ایک تصویر شیئر کی ہے جس میں ان کا پاؤں زخمی نظر آرہا ہے، تاہم پرینیتی جیسی باہمت اداکارہ نے زخمی ہونے کے باوجود ہمت نہیں ہاری اور لکھا کہ زخمی ہونے کے باوجود وہ سرفنگ کرنے کی کوشش کررہی ہیں کیونکہ انہیں سرفنگ کرنا پسند ہے۔ واضح رہے کہ دوروز قبل بھی پرینیتی چوپڑا نے ایک تصویر شیئر کی تھی جس میں وہ ایک جنگلی جانور کوالا کڈل کو گود میں اٹھائی ہوئی تھیں تاہم تصویر شیئر کرنے پر سوشل میڈیا صارفین کی جانب سےانہیں شدید تنقید کا نشانہ بنایا گیا اور جنگلی جانور کے ساتھ تصویر کھینچوانے پر انہیں بیوقوف کہتے ہوئے جانور سے مشابہ قرار دیا گیا۔