اسلام آباد(ایس ایم حسنین)اب بہتر محسوس کر رہاہوں، بہت جلد واپس آئوں گا۔یہ بات امریکی صدر ڈونلٹ ٹرمپ نے ہفتے کی شام ٹوئٹر پر اپنے ویڈیو پیغام میں کہی۔ انھوں نے کہا کہ جب اُنہیں جمعے کو والٹر ریڈ نیشنل ملٹری میڈیکل سنٹر لایا گیا تو اس وقت اُن کی طبیعت ٹھیک نہیں تھی، لیکن اب وہ بہت بہتر محسوس کر رہے ہیں اور سب یہ کوشش کر رہے ہیں کہ اسپتال سے جلد میری واپسی ہو جائے۔ امریکی نشریاتی ادارے کے مطابق صدر نے اسپتال کی اسٹاف کا شکریہ ادا کیا اور کہا کہ وہ سمجھتے ہیں کہ آنے والے چند دن اصل امتحان ہوں گے۔ چار منٹ کے ویڈیو پیغام میں صدر ٹرمپ پرعزم دکھائی دیے، اُنہوں نے کہا کہ وہ دنیا بھر میں وائرس کا شکار ہونے والے لاکھوں افراد کی بہتری کے لیے کوشاں ہیں اور اس وائرس کو شکست دیں گے۔ صدر ٹرمپ نے بتایا کہ خاتون اول میلانیا ٹرمپ بھی اب بہتر محسوس کر رہی ہیں۔ صدر نے کہا کہ وہ وائرس سے بچنے کے لیے خود کو وائٹ ہاؤس تک محدود رکھ سکتے تھے، لیکن اُنہیں یہ مناسب نہیں لگا کہ وہ خود کو ایک کمرے میں بند کر لیں۔ صدر نے کہا کہ وہ جلد صحت یاب ہو کر اپنی صدارتی مہم دوبارہ شروع کریں گے تاکہ امریکہ کو عظیم تر بنانے کا مشن مکمل ہو سکے۔ صدر نے ملٹری اسپتال کے ڈاکٹرز، نرسز اور دیگر عملے کے علاوہ عالمی رہنماؤں اور امریکی عوام کی جانب سے اُن کے لیے نیک خواہشات کا اظہار کرنے پر شکریہ ادا کیا۔ واضح رہے کہ صدر ٹرمپ کو جمعے کی سہ پہر ہیلی کاپٹر کے ذریعے وائٹ ہاؤس کے قریب واقع ایک فوجی اسپتال منتقل کیا گیا تھا اور یہ توقع کی جا رہی ہے کہ وہ مزید کچھ روز تک اسپتال میں ہی رہیں گے۔ فوجی اسپتال میں صدر کے لیے ایک مخصوص کمرہ ہے جہاں دفتری امور سرانجام دینے کے انتظامات موجود ہیں۔ وائٹ ہاؤس کے ترجمان مک نانی نے ایک بیان میں کہا ہے کہ اپنے معالج اور طبی ماہرین کے مشورے پر صدر آئندہ چند روز کے لیے اپنے سرکاری امور والٹر ریڈ اسپتال کے صدارتی دفتر سے سر انجام دیں گے۔ وائٹ ہاؤس کے عہدے داروں کے مطابق 74سالہ صدر کے اسپتال میں داخل ہونے سے صدراتی اختیارات نائب صدر مائیک پینس کو منتقل نہیں ہوئے۔

PRESIDENT, TRUMP, DEALING, WITH, OFFICIAL, AFFAIRS, IN, CONFERENCE, ROOM, OF, HOSPITAL