دسمبر 16 وحشی درندوں پرمعصوم کلیوں کی فتح کا دن ہے، شہدائے اے پی ایس کے والدین کو سلام جنہوں نے پیاروں کو کھونے کے بعد نئے عزم کیساتھ دشمنوں سے مقابلہ کی ٹھانی، قاری فاروق احمد گورسی

اسلام آباد(ایس ایم حسنین) پاکستان پیپلز پارٹی پنجاب کونسل کے ممبرایگزیکٹو قاری فاروق احمد گورسی نے 16 دسمبر وحشی درندوں پرمعصوم کلیوں کی فتح کا دن ہے۔ شہدائے اے پی ایس کے والدین کو سلام جنہوں نے اپنے پیاروں کو کھونے کے بعد نئے عزم کیساتھ دشمنوں کیساتھ مقابلہ کی ٹھان لی۔

ان کا کہنا تھا کہ جن  والدین کے بچے بچ گئے وہ بھی اس ہول ناک دن کو فراموش نہیں کرسکے، دہشت گردوں نے اسکول پر حملہ کرکے علم کی شمع بجھانا چاہی، مستقبل کے معماروں کو نشانہ بنا کرملک اور سیکیورٹی اداروں کا حوصلہ توڑنے کی کوشش کی لیکن قوم کے حوصلے پست نہ ہوئے۔

اس الم ناک حادثے کی پانچویں برسی نے ننھے منے شہید بچوں کے والدین کے زخموں کو پھر سے تازہ کردیا، آنکھوں کے آنسو خشک ہوچکے تھے لیکن بچوں کی پانچویں برسی پر یہ چشمے پھر سے پھوٹ پڑے۔

آرمی پبلک اسکول پشاور پر دہشت گردوں کے حملے کو 5 سال مکمل ہوگئے لیکن شہداء کے والدین تاحال غم کی کیفیت میں ہیں۔ 16 دسمبر کی تاریخ ہر سال آتی ہے اور سانحہ آرمی پبلک اسکول کے زخموں کو کرید کر چلی جاتی ہے، اس دن پشاور میں آرمی پبلک اسکول پر دہشت گردوں نے حملہ کرکے معصوم بچوں کو نشانہ بنایا اور طلبا سمیت 150 افراد کو بے دردی سے شہید کردیا۔