بولی وڈ کے چاکلیٹی ہیرو رنبیر کپور جو ان دنوں اپنے آنے والی بائیوگرافی فلم ’سنجو‘ کی تشہیر میں مصروف ہیں، وہ جلد ہی پہلی بار عالیہ بھٹ کے ساتھ رومانس کرتے نظر آئیں گے۔
رنبیر کپور اور عالیہ بھٹ پہلی بار ’براہمسٹرا‘ میں نظر آئیں گے، جس کی شوٹنگ جاری ہے۔
ان دونوں کی جانب سے پہلی بار کسی فلم میں ایک ساتھ کام کرنے کے آغاز سے ہی چہ مگوئیاں شروع ہوگئی تھیں کہ رنبیر کپور اور عالیہ بھٹ کے درمیان محبت شروع ہوچکی ہے۔
بعد ازاں رنبیر کپور نے دبے دبے الفاظ میں عالیہ بھٹ سے اپنی محبت کا اعتراف کرتے ہوئے اپنے تعلقات کو نیا اور ابتدائی قرار دیا تھا۔
تاہم اب انہوں نے ایک اور قدم آگے بڑھاتے ہوئے جلد شادی کی خواہش کا عندیہ دیا ہے۔دونوں کے درمیان براہمسترا کی شوٹنگ کے درمیان تعلقات استوار ہوئے—فوٹو: پنک ولا
ہندوستان ٹائمز کی رپورٹ کے مطابق ’سنجو‘ کی تشہیر کے لیے ٹوئٹر پر آن لائن مداحوں کے سوالوں کے جوابات دیتے ہوئے رنبیر کپور نےنہ صرف عالیہ بھٹ سے اپنی محبت اور فلمی کیریئر کے حوالے سے بات کی، بلکہ انہوں نے اپنی شادی کی منصوبہ بندی سے بھی پردہ اٹھایا۔
ایک مداح کی جانب سے شادی کے متعلق پوچھے گئے سوال کے جواب میں رنبیر کپور نے کہا کہ وہ جلد سے جلد شادی کرنے کا ارادہ رکھتےہیں۔
اداکار نے یہ نہیں بتایا کہ وہ کس کے ساتھ اور کب تک شادی کرنے کا ارادہ رکھتے ہیں، تاہم انہوں نے جلد رشتہ ازدواج میں بندھ جانے کا عندیہ دیا۔عالیہ بھٹ نے تاحال رنبیر سے محبت کے حوالے س کوئی واضح بیان نہیں دیا—فوٹو: ہندوستان ٹائمز
رنبیر کپور کی جانب سے جلد شادی کی خواہش کا اظہار کرنے کے بعد یہ چہ مگوئیاں مزید تیز ہوگئیں ہیں کہ وہ ساتھی اداکار عالیہ بھٹ سے ہی شادی کریں گے، تاہم اس حوالے سے کچھ بھی کہنا قبل از وقت ہے۔
عالیہ بھٹ اور رنبیر کپور کی مستقبل میں شادی ہوگی یا نہیں، اس حوالے سے تو کچھ نہیں کہا جاسکتا، تاہم دونوں کو گزشتہ ڈیڑھ سال سے متعدد بار ایک ساتھ مختلف تقریبات میں شرکت کرتے ہوئے دیکھا گیا ہے۔
بولی وڈ ذرائع کے مطابق ساتھی اداکارہ دپیکا پڈوکون اور کترینہ کیف سے تعلقات ختم ہونے کے بعد رنبیر کپور عالیہ بھٹ سے تعلقات کو خراب نہیں کرنا چاہتے۔
واضح رہے کہ ماضی میں رنبیر کپور کے اداکارہ کترینہ کیف اور دپیکا پڈوکون سے تعلقات کی خبریں گردش کرتی رہیں۔
رنبیر کپور کو دونوں اداکاراؤں کے ساتھ متعدد بار ایک ساتھ دیکھا گیا، جب کہ اداکار دونوں اداکاراؤں کے ساتھ ایک سے زائد فلموں میں کام بھی کر چکے ہیں۔
اس وقت دپیکا پڈوکون سے ان کے تعلقات ختم ہوچکے ہیں اور اداکارہ ساتھی اداکار رنویر سنگھ سے شادی کرنے کا فیصلہ کر چکی ہیں۔
اطلاعات ہیں کہ رواں برس کے اختتام تک دپیکا پڈوکون بھی شادی کے بندھن میں بندھ جائیں گی۔
جب کہ دوسری جانب کترینہ کیف سے بھی رنبیر کپور کے تعلقات اب ماضی جیسے نہیں رہے، اس لیے وہ تمام تر توجہ عالیہ بھٹ کے ساتھ تعلقات کو بہتر بنانے پر دے رہے ہیں۔
