کراچی: پولیس نے مطلوب متحدہ قائدین کے متعلق عدالت میں رپورٹ دی ہے کہ تمام ملزمان روپوش ہو چکے ہیں۔ عدالت کی جانب سے اشتہار دیا گیا ہے کہ 7 دن کے اندر 21 نومبر کو عدالت میں حاضر ہو جائیں۔

کراچی پولیس کی طرف سے انسداد دہشت گردی کی عدالت میں پیش کی جانے والی رپورٹ میں کہا گیا ہے کہ بغاوت، جلاؤ گھیراؤ اور میڈیا ہاؤسز پر حملے کے کیس کے تمام ملزم گرفتاری سے بچنے کے لئے روپوش ہو چکے ہیں۔

پولیس کی رپورٹ پر عدالت نے متحدہ کے بانی، ایم کیو ایم پاکستان کے سربراہ فاروق ستار اور عامر خان سمیت کئی رہنماؤں کو اشتہاری قرار دے دیا۔

اشتہاری قرار دیئے جانے والے دیگر رہنماؤں میں عبدالقادر، جاوید کاظمی، عارف خان ایڈووکیٹ اور ذاکر قریشی، اکرم راجپوت، اسلم خان آفریدی، اشرف نور اور اکبر شامل ہیں۔

عدالت نے پولیس رپورٹ پر تمام رہنماؤں کے خلاف اخبارات میں اشتہار شائع کروا دیئے ہیں جن میں کہا گیا ہے کہ تمام ملزم 21 نومبر کو عدالت میں حاضر ہو جائیں۔