کراچی: ہائی کورٹ نے نواز شریف کے خلاف آرٹیکل 6 کے تحت آئین سے غداری کا مقدمہ چلانے کی درخواست مسترد کردی۔

Rejects petition of betrayal from constitution against Nawaz Sharif

سندھ ہائی کورٹ میں سابق وزیر اعظم نواز شریف کی گرفتاری اور ان کے خلاف آرٹیکل 6 تحت مقدمہ چلانے سے متعلق درخواست کی سماعت ہوئی جس میں درخواست گزار نے موقف اختیار کیا کہ سابق وزیر اعظم نواز شریف کو گرفتار کرکے آرمی کے حوالے کیا جائے اور سخت تفتیش کی جائے، نواز شریف کے سہولت کار، شہباز شریف، احسن اقبال، خواجہ سعد رفیق، خواجہ آصف اور کابینہ کے دیگر اراکین سے بھی تفتیش کا حکم دیا جائے۔

درخواست گزار کی جانب سے عدالت سے استدعا کی گئی تھی کہ نواز شریف اور دیگر خلاف بھارت سے مراسم رکھنے پر جے آئی ٹی تشکیل دی جائے اور ملکی سلامتی کے اداروں کو حکم دیا جائے کہ معاملے کو باریک بینی سے دیکھیں، سابق وزیر اعظم نواز شریف اور ان کے سہولت کاروں کے خلاف آرٹیکل 6 اور مملکت سے غداری کا مقدمہ چلانے کا حکم دیا جائے۔ سماعت کے موقع پر چیف جسٹس ہائی کورٹ نے ریمارکس دیے کہ وزیر اعظم پر الزامات ہیں اس پر کارروائی کا ہمارا دائرہ اختیار نہیں، عدالت نے درخواست مسترد کرتے ہوئے درخواست گزار کو وزیراعظم کے خلاف کارروائی کے لیے سپریم کورٹ سے رجوع کرنے کی ہدایت کی۔