Hans Raj Hans

لاہور : معروف گلوکارہنس راج ہنس نے ’’بجرنگی بھائی جان‘‘ کی پاکستان اوربھارت سمیت دنیا بھرمیں کامیابی پربالی وڈ اسٹار سلمان خان اوران کی ٹیم کومبارکباد دیتے ہوئے کہا ہے کہ فنون لطیفہ کے سب سے مقبول میڈیم فلم کے ذریعے مثبت اورمنفی پیغام دیا جاسکتا ہے لیکن جس طرح پاکستان اوربھارت کے تعلقات کو بہتر کرنے کی کوشش کی گئی ہے۔

اس پرمیں ’’بجرنگی بھائی جان ‘‘ کی پوری ٹیم کو سلام پیش کرتا ہوں۔ ان خیالات کااظہارہنس راج ہنس نے گزشتہ روز بات کرتے ہوئے کیا۔ انھوں نے کہا کہ پاکستان اور بھارت کے تعلقات کوبہتر اورمستحکم کرنے میں شوبز، کلچراورسپورٹس کے شعبوں سے تعلق رکھنے والے لوگ ہی اہم کردارادا کرسکتے ہیں۔ سیاستدان کی باتوں پراب لوگ یقین نہیں کرتے اوراسی لیے حالات بہتر ہونے کی بجائے بگڑتے چلے جاتے ہیں ۔

انھوں نے کہا کہ سلمان خان بھارت کے ایک ایسے سپراسٹارہیں جن کے چاہنے والے دنیا بھر میں آباد ہیں۔ انھوں نے ’’بجرنگی بھائی جان‘‘ کی شکل میں ایک ایسی فلم بنا ڈالی ہے جس کی کہانی سب لوگوں کے اس قدر قریب ہے کہ سینما ہال میں لوگ رونے لگتے ہیں۔ یہی وہ فلمیں ہیں جن کے موضوعات اورفنکاروں کی پرفارمنس دلوں کی کڑواہٹ کو دورکرکے محبت کو پروان چڑھا رہی ہیں۔

ہندوستان اور پاکستان ہی نہیں دنیا بھر میں اس فلم کو دیکھنے کے بعد لوگوں کی سوچ میں واضح تبدیلی آرہی ہے، جو میرے نزدیک بہت ہی خوش آئند بات ہے۔

ایک سوال کے جواب میں ہنس راج ہنس نے کہا کہ میں توصوفی ازم کا طالبعلم ہوں اورمیں نے ہمیشہ پاکستان اور بھارت کے تعلقات کی بہتری کی بات کی ہے، اس لیے میرے لیے تو عیدالفطر کا دن اس لیے بھی بہت خاص بن چکا تھا کہ اس دن سلمان خان اورفلم میں کام کرنے والے تمام فنکاروں نے اپنی عمدہ اداکاری کی شکل میں ایک ایسا تحفہ دیا ہے جوہرلحاظ سے انمول ہے۔