Saeed Ajmal

کراچی : سعید اجمل کی کارکردگی کو نیشنل کرکٹ اکیڈمی میں جانچا جائے گا، چیف سلیکٹر ہارون رشید کے مطابق آئندہ ماہ آسٹریلیا سے واپسی پر کوچ وقار یونس بھی آف اسپنر کی بولنگ دیکھیں گے۔

دوسری جانب سعید ایک بار پھر قومی کرکٹ ٹیم میں واپسی کیلیے پُرعزم ہیں۔ تفصیلات کے مطابق بولنگ ایکشن میں تبدیلی سے سعید اجمل کی بولنگ کا جادو ختم ہو گیا، رواں انگلش کاؤنٹی سیزن میں ووسٹر شائر کی جانب سے7میچز میں انھوں نے 48.50 کی اوسط سے صرف 16 کھلاڑیوں کو آؤٹ کیا ہے۔

وہ آئندہ ہفتے مزید ایک میچ کھیل کر وطن واپس آ جائیں گے، چیف سلیکٹر ہارون رشید نے ایک غیرملکی خبررساں ایجنسی سے بات چیت میں کہا کہ اس وقت ہم انگلینڈ میں سعید اجمل کی بولنگ کے اعدادوشمار پر نظر رکھے ہوئے ہیں، وطن واپسی کے بعد نیشنل کرکٹ اکیڈمی بلا کر ان کی کارکردگی جانچی جائے گی۔

آئندہ ماہ آسٹریلیا سے واپسی کے بعد ہیڈ کوچ وقار یونس بھی سعید اجمل کی بولنگ دیکھیں گے۔ دوسری جانب سعید اجمل ایک بار پھر قومی کرکٹ ٹیم میں واپسی کیلیے پُرعزم ہیں، ایک انٹرویو میں انھوں نے کہا کہ میں ڈومیسٹک سیزن میں شرکت کی جانب دیکھ رہا ہوں، مجھے امید ہے کہ اچھی کارکردگی کی بدولت ایک بار پھر انٹرنیشنل کرکٹ کھیلنے کا موقع ملے گا، بطور بولر اب بھی میں اپنے ملک کو بہت کچھ دے سکتا ہوں۔

سعید اجمل نے کہا کہ ووسٹرشائر کے ڈائریکٹر کرکٹ اسٹیو رہوڈز اور بائیومکینکس ماہر پال ہورین نئے ایکشن کے ساتھ میری بولنگ میں بہتری سے بہت خوش ہیں،اس سے میرا حوصلہ بڑھ گیا ہے، انھوں نے کہا کہ گذشتہ چند ماہ میرے لیے بہت مشکل رہے، ووسٹر شائرکیلیے اس سیزن میں زیادہ کامیاب ثابت نہ ہو سکا مگر پابندی ختم ہونے کے بعد فرسٹ کلاس کرکٹ میں واپسی پر بہت خوش ہوں۔