بالی ووڈ کے سلومیاں کی ہوم پروڈکشن میں بننے والی فلم ’لوراتری‘ کو ہندوانتہا پسندوں کی جانب سے ریلیز نہ کیے جانے کی دھمکیاں موصول ہورہی ہیں۔

بھارتی میڈیا رپورٹس کے مطابق فلم ’لوراتری‘ سلمان کی بہن ارپیتا خان کے شوہر اورسلمان خان کے بہنوئی آیوش شرما کی پہلی فلم ہے، یہی وجہ ہے کہ سلمان خان اس فلم کولے کر بہت پرجوش ہیں اورفلم کی تشہیری مہم میں خود حصہ لے رہے ہیں، تاہم فلم ریلیزسے قبل ہی مشکلات کا شکار ہوگئی۔

تفصیلات کے مطابق ہندو انتہا پسندوں کوفلم کے نام پراعتراض ہے یہی وجہ ہے کہ انتہا پسند جماعتوں نے فلم کے خلاف مظاہرے کرنے شروع کردئیے ہیں۔

دی ورلڈ ہندوکونسل کے ایگزیکٹیو پریزیڈنٹ آلوک کمار نے فلم کے نام پراعتراض کر تے ہوئے کہا ہے کہ فلم کانام ’لوراتری‘ ہندوؤں کے مقدس تہوار’نوراتری‘ سے ملتا ہے اور ہمیں یہ نام بالکل بھی منظورنہیں ہے۔

واضح رہے کہ فلم میں ہندوؤں کے تہوارنوراتری کے درمیان ہیرو اور ہیروئن کے درمیان محبت دکھائی گئی ہے۔

فلم کی کہانی نارائن بھٹ نے تحریرکی ہے جب کہ ہدایات ابھی راج مینا والا نے دی ہیں۔

فلم رواں سال 5 اکتوبر کو ریلیز کی جائے گی۔