اسلام آباد: سعودی ولی عہد محمد بن سلمان کا دورہ پاکستان، آج پاکستان میں مصروف ترین دن گزاریں گے۔ صدر پاکستان سعودی ولی عہد کے اعزاز میں ظہرانہ دیں گے۔

صدر مملکت سعودی ولی عہد محمد بن سلمان کو اعلیٰ ترین سول ایوارڈ نشان پاکستان سے نوازیں گے۔ تقریب کے بعد عارف علوی اور سعودی ولی عہد کی ملاقات ہو گی۔ چیئرمین سینٹ صادق سنجرانی وفد کے ہمراہ سعودی ولی عہد سے ملاقات کریں گے۔ سپیکر قومی اسمبلی اسد قیصر کی بھی وفد کے ہمراہ سعودی ولی عہد سے ملاقات کا امکان ہے۔ آرمی چیف جنرل قمر بھی سعودی ولی عہدسے ملاقات کریں گے۔ سعودی ولی عہد آج سہ پہر دورہ مکمل کر کے روانہ ہو جائیں گے۔ وزیراعظم اور کابینہ ارکان معزز مہمان کو نور خان ایئر بیس سے روانہ کریں گے۔

تفصیلات کے مطابق سعودی مہمان آج صدر پاکستان عارف علوی، چیئرمین سینیٹ صادق سنجرانی اور آرمی چیف جنرل قمر جاوید باجوہ سے ملاقاتیں کریں گے۔ ایوان صدر میں سعودی ولی عہد کے اعزاز میں ظہرانہ دیا جائے گا، شہزادہ محمد بن سلمان کو پاکستان کا اعلیٰ ترین سول ایوارڈ بھی دیا جائے گا۔سعودی ولی عہد شہزادہ محمد بن سلمان کے طیارے کو پاکستان کی حدود میں داخل ہوتے ہی ایف 16 اور جے ایف 17 تھنڈر طیاروں نے اپنے حفاظتی حصار میں لے لیا اور منزل مقصود تک پہنچایا۔نور خان ایئر بیس پر وزیر اعظم عمران خان، آرمی چیف جنرل قمر جاوید باجوہ اور کابینہ کے ارکان نے سعودی مہمان کا پرتپاک استقبال کیا۔ وزیراعظم ہاؤس میں سعودی ولی عہد کو گارڈ آف آنر دیا گیا۔سعودی ولی عہد شہزادہ محمد بن سلمان کے طیارے کوپاکستان کی حدود میں داخل ہوتے ہی ایف 16 اور جےایف تھنڈر طیاروں نے اپنے حصار میں لے لیا اور پورے پروٹوکول کے ساتھ نور خان ایئربیس اسلام آباد تک پہنچایا جہاں شاہی مہمان کو وزیر اعظم عمران خان، آرمی چیف جنرل قمر جاوید باجوہ اور وزیر مہمان داری خسرو بختیار نے خوش آمدید کہا۔

ایئر بیس پر معزز مہمان کو21توپوں کی سلامی پیش کی گئی۔ وزیر اعظم عمران خان ولی عہد کے ہمراہ خود گاڑی ڈرائیو کر کے پرائم منسٹر ہاؤس آئے،ایئر بیس تا پی ایم ہاؤس راستوں کو پاک سعودی پرچموں، بینرز اور بل بورڈز سے سجایا گیا،راستے میں جگہ جگہ روایتی ڈانس اور بھنگڑا پارٹیوں نے علاقائی رقص پیش کر کے شاہی مہمان کو خوش آمدید کہا۔پرائم منسٹر ہاؤس آمد پر پاک فوج کے چاک و چوبند دستے نے گارڈ آف آنر پیش کیا، سعودی ولی عہد کی وزیراعظم عمران خان سے ون آن اور بعد میں وفود کی سطح پر ملاقات ہوئی۔ وزیراعظم کی طرف سے شاہی مہمان کے اعزاز میں عشائیہ دیا گیا۔اس موقع پر سعودی ولی عہد شہزادہ محمد بن سلمان کا اپنے خطاب میں کہنا تھا کہ پاکستان زبردست قیادت کے باعث روشن مستقبل رکھتا ہے۔20ارب ڈالر کی سرمایہ کاری کے معاہدوں کا پہلا مرحلہ مکمل کیا ہے۔انہوں نے مزید کہا کہ سعودی عرب پاکستان میں مزید سرمایہ کاری کرے گا۔یقین ہے کہ وزیراعظم عمران خان کی قیادت میں پاکستان بہت آگے بڑھے گا۔سعودی ولی عہد نے کہا کہ سرمایہ کاری کے لیے پاکستان میں ایسی ہی قیادت کے آنے کا انتظار کر رہے تھےآنےوالے وقت میں دونوں ممالک کے تعلقات مزید پروان چڑھیں گے۔شہزادہ محمد بن سلمان نے یہ بھی کہا کہ انہیں سعودی عرب میں پاکستان کا سفیر سمجھا جائے۔وزیر اعظم عمران خان نے کہا کہ سعودی عرب ہر ضرورت اور مشکل میں ہمارے ساتھ رہا ہے۔انہوں نے عازمین حج کو پاکستان میں امیگریشن کی سہولت دینے اور سعودی عرب میں معمولی جرائم میں قید3ہزار پاکستانیوں کی رہائی کی درخواست کی۔