اسلام آباد(ایس ایم حسنین)امریکی سکریٹری خارجہ انٹونی جے بلنکن نے ڈینئل پرل کیس میں سزا یافتہ عمرسعید شیخ کی رہائی کے بارے میں اپنے تحفظات کا اظہارکردیا. امریکی سٹیٹ ڈیپارٹمنٹ کی طرف سے جاری بیان میں کہا گیا ہے کہ سیکرٹری خارجہ اینٹونی جے بلنکن نے وزیر خارجہ شاہ محمود قریشی سے ٹیلی فونک رابطے میں امریکی صحافی ڈینیئل پرل کے اغوا اور قتل میں سزا یافتہ احمد عمر سعید شیخ اور دیگر افراد کے احتساب کو یقینی بنانے کے بارے میں تبادلہ خیال کیا۔ سکریٹری بلنکن نے پاکستانی سپریم کورٹ کے فیصلے اور ان قیدیوں کی ممکنہ رہائی کے متعلق امریکی خدشات کا کھل کر اظہار کیا ۔ بیان میں کہا گیا کہ سکریٹری بلنکن نے وزیر خارجہ شاہ محمود قریشی سے افغان امن عمل ، امریکی علاقائی استحکام کے لئے معاونت ، اور دوطرفہ تجارتی تعلقات کو وسعت دینے کی صلاحیت پر جاری امریکی پاکستان تعاون کی اہمیت پر تبادلہ خیال کیا۔دریں اثنا اسلام آباد میں وزارت خارجہ کی جانب سے جاری بیان میں کہا گہا ہے کہ وزیر خارجہ مخدوم شاہ محمود قریشی سے امریکی سیکرٹری خارجہ اینٹونی جے بلنکن نے منصب سنبھالنے کے بعد پہلی مرتبہ ٹیلی فونک رابطہ کیا اور دوطرفہ تعلقات اور افغان امن سمیت مشترکہ دلچسپی کے امور پر تفصیلی تبادلہ خیال کیا. وزیرخارجہ شاہ محمود قریشی اور سیکریٹری بلنکن نے رابطے استوار رکھنے ، دونوں ممالک کے دوطرفہ ایجنڈے میں پیش رفت، خطے اور دنیا میں مشترکہ مفادات کے فروغ کے لئے مل کر کام کرنے پر اتفاق کیا۔ وزیر خارجہ مخدوم شاہ محمود قریشی نے سیکریٹری بلنکن کو منصب سنبھالنے پر مبارک دی اور انہوں نے امریکہ کے ساتھ وسیع موضوعات پر مفادات کی یک جائی کی بنیاد پرجامع شراکت داری قائم کرنے کے پاکستان کے عزم کا اظہار کیا.پاکستان میں تبدیلی کا حوالہ دیتے ہوئے وزیر خارجہ نے زور دیا کہ وزیراعظم عمران خان کی حکومت معاشی شراکت داری، پرامن ہمسائیگی پروان چڑھانے اور علاقائی روابط میں اضافہ کے فرو غ کے نئے وژن پر کاربند ہے۔ وزیر خارجہ مخدوم شاہ محمود قریشی نے سیکریٹری بلنکن کو بتایا کہ افغانستان میں مذاکرات کے نتیجے میں سیاسی تصفیہ سے حاصل ہونے والا امن دونوں ممالک کے مشترک مفادات میں سے ایک ہے۔ تشدد میں کمی ،جو جنگ بندی پر منتج ہو ،اور افغانستان میں ایک جامع سیاسی تصفیہ کے حصول کے لئے مل کر کام کرنا ناگزیر ہے۔ پاکستان نے افغان امن عمل میں سہولت کاری کی ہے اور امریکہ کے ساتھ امن کے شراکت دار کے طورپر امورکار انجام دینے میں پرعزم رہا ہے۔ وزیر خارجہ نے دہشت گردی کے خلاف پاکستان کے پرعزم اقدامات اور عظیم قربانیوں کو بھی اجاگر کیا.سیکریٹری بلنکن نے گزشتہ برسوں میں امریکہ اور پاکستان کے درمیان تعاون کا حوالہ دیتے ہوئے قرار دیا کہ روابط کے فروغ کے لئے دونوں ممالک میں کئی شعبے موجود ہیں۔ انہوں نے دہشت گردی کے خلاف جنگ میں پاکستان کے عوام کی قربانیوں کا اعتراف کیا.ڈینئیل پرل کیس میں حالیہ ہونے والی پیش ہائے رفت کے تناظر میں وزیر خارجہ نے کہاکہ یہ اہم اور باہمی مفاد میں ہے کہ قانونی ذرائع سے انصاف ہوا ہے۔ وزیر خارجہ نے ان اقدامات کو اجاگر کیا جو اس ضمن میں کئے جارہے ہیں۔