تانیہ خاصخیلی قتل کیس کے مرکزی ملزم خانو نوہانی گرفتار کرلیا گیا۔ ذرائع کے مطابق مبینہ قاتل کو بلوچستان کے علاقے دریجی سے گرفتار کیا گیا، جہاں وہ مقامی ایم این اے کے ماموں کے پاس روپوش تھا۔
واضح رہے کہ سندھ کے دادو ضلع میں سہون کے پاس جھانگارا میں میٹرک کی طالبہ اور مزدور کی بیٹی تانیہ خاصخیلی کو وہاں کے ایک مقامی وڈیرے نے مبینہ طور پر گھر میں گھس کر بیدردی سے قتل کردیا تھا۔ قتل کی وجہ لڑکی کے والدین کی طرف سے ملزم کے رشتہ سے انکارتھا۔ وزیراعلیٰ سندھ مراد علی شاہ نے ملزمان کی عدم گرفتاری پر مقامی ایس ایچ کو معطل کردیا تھا جبکہ چیف جسٹس سندھ ہائیکورٹ احمد علی شیخ نے واقعے کا نوٹس لیتے ہوئے پولیس کو منگل کے روز رپورٹ جمع کرانے کا حکم دیا تھا۔ میڈیا رپورٹس کے مطابق جامشوروپولیس نے خانونی نوحانی کے ایک ساتھی مولابخش نوہانی کو سیہون میں چھاپے کے دوران گرفتار کرنے کا دعویٰ کیا تھا۔
