اسلام آباد(ایس ایم حسنین)وزارت خارجہ نے بھارتی قابض فورسز کی لائن آف کنٹرول پر سیز فائر کی سنگین خلاف ورزیوں اور بھاری ہتھیاروں کے استعمال پر شدید احتجاج کرتے ہوئے بھارتی ہائی کمیشن کے سینئر سفارتکار کو طلب کرلیا۔ ترجمان دفتر خارجہ زاہد حفیظ چوہدری کے مطابق پاکستان کا بھارت سے اشتعال انگیزیوں پر شدید احتجاج کرتے ہوئے احتجاجی مراسلہ بھارتی سینئر سفارتکار کے حوالے کیا۔ ترجمان نے کہا کہ بھارتی فورسز نے30 ستمبر کو ایل او سی پر بلااشتعال فائرنگ کی جس کے نتیجے میں ایک نہتا شہری شدید زخمی ہوا، بیان میں کہا گیا ہے کہ رواں برس بھارت نے ابتک فائر بندی انتظام کی 2404 خلاف ورزیاں کیں، جن میں 19 معصوم شہری شہید اور 192 شدید زخمی ہوئے۔ ترجمان کا کہنا تھا کہ بھارت کا معصوم شہریوں کو جان بوجھ کر نشانہ بنانا قابل مذمت ہے، بھارتی فورسز مسلسل لائن آف کنٹرول، ورکنگ باونڈری پر شہری آبادی کو نشانہ بنا رہی ہیں، بھارت کی پے در پے اشتعال انگیزیاں خطے میں امن و سلامتی کے لیے خطرہ ہیں،بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا،بیان میں مطالبہ کیا گیا کہ بھارت اقوام متحدہ سلامتی کونسل کی قراردادوں پر عمل درآمد یقینی بنائے اور 2003ء کے جنگ بندی انتظام کی پاسداری کرے، بیان میں کہا گیا ہے کہ ہندوستان کا نہتے شہریوں کو نشانہ بنانا عالمی قوانین، اقدار کے منافی ہے، بھارت اقوام متحدہ فوجی مبصر مشن کو ایل او سی پر کام کرنے دے۔

،