صوبائی وزیر بلدیات ناصر شاہ نے برصغیر کی عظیم روحانی شخصیت سید عبداللہ شاہ غازی کے1287ویں عرس کی 3روزہ تقریبات کا آغاز کر دیا۔
اس موقع پر صوبائی وزیر بلدیات کا کہنا تھا کہ عبداللہ شاہ غازی کے عرس کی تقریبات میں شرکت کے لیے ملک بھر سے زائرین آتے ہیں لہذا سکیورٹی کے انتظامات مکمل کرلیے گئے ہیں۔ انھوں نے بتایاکہ ہم نے واک تھرو گیٹ نصب کرنے کے علاوہ مزید سی سی ٹی وی کیمرے بھی لگائے ہیں۔ اس سے قبل 1287ویں عرس مبارک عرس مبارک کا آغاز پیر کی شب مزار شریف کو غسل دینے کی تقریب سے ہو ا جس میں ملک بھر کی روحانی شخصیات شریک ہوئیں ۔ عرس مبارک تین روز تک جاری رہے گا ۔ محکمہ اوقاف کے مطابق 12ستمبر کو بعد نماز فجر قرآن خوانی اور بعد نماز عشاء محفل سماع ہو گی جس میں ملک بھر کے نامور قوال شرکت کریں گے۔
13ستمبر کو بعد نماز ظہر محفل میلاد (خواتین) ہو گی اور بعد نماز عشاء محفل میلاد ہو گی جس میں نامور نعت خوان اپنا کلام پیش کریں گے۔ 14ستمبر صبح 10بجے قل شریف کی محفل ہو گی جس میں ملک کے نامور قوال شرکت کریں گے اور بعد نماز عشاء محفل دھمال ہو گی جس میں فنکاروں کو مدعو کیا گیا ہے ۔ آخری روز عرس کی اختتامی تقریب میں وزیر اعلی سندھ سید مراد علی شاہ شرکت کریں گے۔
