لاہور(ویب ڈیسک) تحریک لبیک کے مرکزی رہنما پیر افضل قادری نے تحریک لبیک کی ذمہ داریوں سے سبکدوشی کا اعلان کرتے ہوئے حکومت، پاک فوج اور عدلیہ سے دلی معذرت کر لی۔ ویڈیو بیان میں انہوں نے کہاآئین اوراداروں کا احترام کیا جائیگا ۔ملکی دفاع کیلئے پاک فوج کے شانہ بشانہ ہیں،کارکن اخلاق کا مظاہرہ کریں اور پر امن رہیں ،ریٹائرمنٹ کا فیصلہ صحت کی خرابی کی وجہ سے کیا ۔انہوں نے کہا میں حکومت، عدلیہ اور چیف آف آرمی سٹاف کی دل آزاری پر انتہائی معذرت خواہ ہوں اورانشاء اﷲ العزیز تحریک لبیک کے ذمہ داران صورتحال اور قیادت کی بھاری ذمہ داریوں کا احساس کرتے ہوئے معاملات بہتر اورمعاشرے کی اصلاح کیلئے کردار ادا کرینگے ۔وطن عزیز کی فلاح ، سلامتی ، امن و امان کے لئے اوربد امنی کے خاتمہ کیلئے کردار ادا کرینگے ۔ اپنا نکتہ نظر قر آن و سنت اور آئین وقانون کی روشنی میں مناسب انداز میں بیان کیاجائیگا ،جلاؤ گھیراؤ اور عوامی و سرکاری املاک کو نقصان پہنچانے کی اجازت نہیں دی جائیگی۔دہشتگردی ، قتل وغارت ، فتنہ فساد اور فرقہ وارانہ مسلح کارروائیوں کی حوصلہ شکنی کریں گے ۔کارکن ملکی سلامتی کیخلاف تمام امور سے اجتناب کریں، کوئی کارکن غیر اسلامی و غیر قانونی سرگرمیوں میں ملوث ہوا تو تحریک کے ڈسپلن کے تحت تادیبی کارروائی اور لاتعلقی اختیار کی جائیگی۔ انہوں نے کہا صحت شدید خراب ہو چکی ہے ،ریٹائر منٹ کا فیصلہ گزشتہ سال کر اور احباب کو بھی مطلع کردیا تھا ۔