کوک سٹوڈیو سیزن 8 کے شاہکار ’’تاجدار حرم‘‘ نے اب تک سیزن کے تمام گانوں کی مقبولیت میں سب پر سبقت حاصل کرلی ہے۔ مذکورہ تاجدار حرم سے یوٹیوب پر لطف اندوز ہونیوالوں کی تعداد 10 کروڑ سے تجاوز کرچکی ہے۔ 10 کروڑ سے زائد بار ملاحظہ کرنے کے علاوہ تاجدار حرم پر 50 لاکھ سے زائد انگیج منٹس ہوئیں اور دنیا کے 186 سے زائد ممالک میں مقیم موسیقی سے لگائو رکھنے والے یو ٹیوب کی بدولت اس گانے سے لطف اندوز ہوئے۔ عاطف اسلم کی مسحور کن آواز،بابر علی کھنہ کے طبلے کی تال اور ہارمونیم پر ارسلان ربانی کے نمایاں ٹیمپو سے ہر طرف ایک سماں سا بندھ جاتا ہے۔ اس حوالے سے رضوان یو خان نے بتایا ہمیں اب اگلے سال سیزن 11 میں پہلے کے مقابلے میں زیادہ بلند معیار کی توقع ہے۔ تاجدار حرم کے قریب ترین کوک سٹوڈیو سیزن 9 کا خوبصورت گانا  آفرین آفرین ہے جسے 9 کروڑ 90 لاکھ سے زائد افراد دیکھ چکے ہیں اور یہ گیت بھی 10 کروڑ کا سنگ میل جلد عبور کرنے والا ہے۔