The people of Kashmir

کشمیری الیکشن میں ہمیں کامیاب کرائیں ان کو تمام حقوق دلانے کا وعدہ کرتا ہوں :چیئرمین پیپلزپارٹٰی کا باغ میں جلسے سے خطاب
باغ (یس اُردو)بلاول بھٹو زرداری نے کہا ہے کہ آج بھارت میں وہ انسان برسراقتدار ہے جس کے ہاتھوں پر گجرات کے مسلمانوں کا خون ہے ۔ ہم انشا اللہ کشمیر کو ضرور آزادی دلائیں گے ، خدا کے فضل و کرم سے کشمیر کے یہ الیکشن عام نہیں تاریخی الیکشن ثابت ہوں گے ۔ باغ میں جلسہ عام سے خطاب کرتے ہوئے انہوں نے کہا کہ مودی کے منتخب ہونے پر بھارتی تجزیہ کار بھی پریشان تھے ۔ انہوں نے کہا کہ بھارتی وزیر اعظم نریندر مودی کو بہت سے ملک دہشتگرد سمجھتے ہیں ، ہماری جماعت نے ہمیشہ کشمیریوں کے حق کی بات کی ، انہوں نے کہا کہ حکمرانوں نے تحریک آزادی کشمیر کو مذاق بنا دیا ہے ، نواز شریف نے اپنی سالگرہ کا کیک مودی کے ہاتھوں کٹوا لیا ، انہیں یہ کیوں یاد نہیں کہ مودی کے دور میں مقبوضہ کشمیر میں ظلم و ستم اپنے عروج پر تھا ۔ وزیر اعظم را کے ایجنٹوں سے ملاقاتیں کر رہے ہیں ، بلوچستان میں را کے ایجنٹ گرفتار ہوتے ہیں تو نواز شریف کوئی ایکشن نہیں لیتے ، انہوں نے کہا کہ میاں نواز شریف نے خارجہ پالیسی کا حلیہ ہی بگاڑ دیا ، یہ ریاست کے ریاست سے تعلقات نہیں ، انڈیا ہمارا دشمن ، افغانستان اور ایران بھی ہمارے خلاف ہیں ، کشمیری بھائیو یہ الیکشن آپ کی عزت اور کشمیر کے مستقبل کا سوال ہے ۔ اگر یہاں کے عوام نے الیکشن میں میرا ساتھ دیا تو میرا وعدہ ہے کہ میں اس ملک کو عالمی برادی میں اس کا اصل مقام دلائوں گا ۔ انہوں نے کہا کہ متحدہ ہندوستان میں مسلمان اقلیت میں تھے ، انہوں نے مل کر پاکستان بنایا ، اس لئے کہ یہاں پر کسی کو عقیدے کی بنیاد پر تنگ نہ کیا جائے ، ہمارا دین بھی اقلیتوں کے تحفظ کا درس دیتا ہے ۔ بلاول بھٹو نے کہا کسان اپنی محنت سے فصلیں اگاتا ہے اور نواز شریف وہی فصلیں انڈیا سے درآمد کرلیتے ہیں ، انہوں نے کہا کہ ہم نے اہنے دور حکومت میں اقلیتوں کے حقوق کا تحفظ کیا جس کا درس ہمارے مذہب نے دیا ہے ۔ آج نواز حکومت اقلیتوں کے حقوق کے تحفظ میں ناکام ہوچکی ہے اور ہچکولے کھا رہی ہے ، اگر عوام کی حمایت حاصل رہی تو میں عوام کو ان حکمرانوں سے نجات دلائوں گا اور سرکس کے شیروں کا کھیل ختم کروں گا میں اس کا بیٹا ہوں جس کے بارے میں کہا جاتا ہے ۔ اس موقع پر انہوں نے نعرہ لگایا شیروں کا شکاری زرداری بلاول بھٹو نے کہا کہ ہم پاناما لیکس کی شفاف تحقیقات چاہتے ہیں ، میاں صاحب یا تو آپ یہ مان لیں کہ آپ اس وقت غلط تھے یا میرا مطالبہ مان لیں اور گھر چلے جائیں ۔ آج ن لیگ کے اقتدار کی کشتی ہچکولے کھا رہی ہے ، میاں صاحب آپ نے ہمارے لیڈروں کو جھوٹے مقدمات میں پھنسا دیا مگر وہ آپ کی طرح ملک سے بھاگنے والے نہیں مقدمات کا سامنا کریں گے ، آپ نہ تو اسمبلی میں آتے ہیں اور نہ ہی عوامی مطالبات کو تسلیم کرتے ہیں ۔ اسحاق ڈار کے حدیبیہ پیپر ملز کے منصوبے کا احتساب نہیں ہوتا جس میں انہوں نے خود منی لانڈرنگ کا اعتراف کیا تھا ، بلاول بھٹو نے کہا کہ حکومت نے تین سال میں کشمیر پر بیان بازی کے علاوہ اور کچھ نہیں کیا نہ ہی کوئی منصوبہ شروع کیا ہے ۔ کوئی یونیورسٹی ، کوئی ہسپتال نہیں بنایا گیا ۔ انہوں نے عوام کو مخاطب کرتے ہوئے کہا کہ میرے ہاتھوں میں کمان ہے اور آپ کمان ہیں، آئیں مل کر ظالموں کیخلاف تیر چلائیں اور ان کا خاتمہ کردیں ۔ اس موقع پر بلاول بھٹو نے نعرہ لگایا ۔ زندہ ہے بھٹو زندہ ہے زندہ ہے بی بی زندہ ہے یا اللہ یا رسول بے نظیر بے قصور کرپشن کے سردار کو ایک دھکا اور دو ، گرتی ہوئی دیوار کو ایک دھکا اور دو