پیپلز پارٹی اپنے 50 ویں یوم تاسیس پر آج اسلام آباد کے پریڈ گراؤنڈ میں میدان سجائے گی ۔پارٹی کے چیئرمین بلاول بھٹو زرداری نئی سیاسی حکمت عملی کا اعلان کریں گے۔
پیپلز پارٹی کے قیام کے 50سال مکمل ہونے پر وفاقی دارلحکومت کے پریڈ گراؤنڈ میں بڑے جلسے کی تیاریاں کر لی گئیں ، ہر طرف پارٹی پرچم لہرا دیے گئے ،ساؤنڈ سسٹم بھی نصب کر دیا گیا ،پارٹی ترانے گونجیں گے اور لوک فنکار بھی پرفارم کریں گے۔
چیئرمین پیپلزپارٹی بلاول بھٹو زرداری نے دیگر قائدین کے ساتھ خود جلسہ گاہ کا دورہ کیا اور انتظامات کا جائزہ لیا ۔قائدین کہتے ہیں جلسے میں لاکھوں لوگ شرکت کریں گے۔ جلسے سے پہلے جیالوں کا لہو گرمانے کے لیے اسلام آباد میں مختلف تقاریب بھی جاری ہیں، کہیں پارٹی پرچم کے رنگوں والی چوڑیاں پہنی جا رہی ہیں تو کہیں مہندی رچائی جا رہی ہے۔
