واشنگٹن: پاک امریکا تعلقات میں برف پگھلنے لگی ہے، امریکہ کی نائب وزیر خارجہ پاکستان کے دورے کیلئے اسلام آباد روانہ ہو گئیں۔ ایلس ویلز پاکستان میں فوجی اور سول قیادت سے ملاقاتیں کریں گی۔
امریکی صدرڈونلڈ ٹرمپ کی افغان پالیسی کے اعلان کے بعد پاک امریکا تعلقات میں سرد مہری آ گئی ہے۔ امریکہ کی نائب وزیر خارجہ کے دورہ پاکستان سے برف پگھلتی ہوئی محسوس ہو رہی ہے۔ امریکی نائب وزیر خارجہ ایلس ویلز اپنے دورہ کے دوران ریکس ٹیلرسن کے دورہ پاکستان کو حتمی شکل دیں گی۔ ایلس ویلز پاکستان میں فوجی اور سول قیادت سے ملاقاتیں کریں گی، جن میں خطے میں درپیش مسائل پر تبادلہ خیال اور افغان مصالحتی عمل پر پاکستان کے کردار پر تفصیلی بات چیت ہو گی۔ ملاقاتوں میں افغانستان اور بھارت کے پاکستان کے ساتھ معاملات پر بھی تفصیلی تبادلہ خیال بھی کیا جائے گا۔
