لاہور: اداکارہ وماڈل صنم بخاری نے کہا ہے کہ راتوں رات شہرت اورکامیابی کی بلندیوں کوچھونا ہو تو شوبز سے بہترکوئی دوسرا شعبہ نہیں۔

صنم بخاری نے گفتگو کرتے ہوئے کہا کہ ہم اگر پاکستان فلم انڈسٹری پر نظر ڈالیں تو گزشتہ دو دہائیوں کے دوران پاکستان فلم انڈسٹری کو شدید بحران کا سامنا رہا ہے۔ ملک بھر میں سینما گھر ختم ہونے لگے، نگار خانے اور سینما گھروں کی ویرانی نے فلم نگری کی اصل شکل دکھائی تو ہرطرف سے آہیں اور سسکیاں سنائی دینے لگیں۔ لیکن یہ آہیں اور سسکیاں پاکستان فلم انڈسٹری سے وابستہ ہونے والے معروف فنکاروں کی نہیں بلکہ ان ٹیکنیشنز اور ہنرمندوں کی تھیں، جنہوں نے اپنی تمام عمر اس شعبے کے لیے وقف کر دی تھیں۔ مگر اب ایک مرتبہ پھر پاکستان فلم اور سینما انڈسٹری بہتری کی جانب گامزن ہے۔

اداکارہ نے کہا کہ بہت سے نوجوان فلم میکرزجدید ٹیکنالوجی کے ذریعے اچھی فلمیں پروڈیوس کررہے ہیں، جبکہ بہت سے نوجوان فنکار، اب ’فلم اسٹار‘ بن کر لوگوں کے دلوں پر راج بھی کر رہے ہیں۔ یہی اس شعبے کی انفرادیت ہے اوراسی کی وجہ سے لوگ فلم انڈسٹری کوسب سے زیادہ پسند کرتے ہیں۔ انہوں نے کہا کہ اب ضرورت اس بات کی ہے کہ نوجوان فلم میکرزپاکستانی فلم اورسینما کی تعداد بڑھانے اوراس کے معیارکو مزید بہتربنانے کے لیے کوشاں رہیں، اگراس سلسلہ کویہیں روک دیا گیا توموجودہ دورکا حال ، ماضی جیسا ہونے میں دیرنہیں لگے گی۔