جڑواں شہروں کے ٹرانسپورٹرز نے کرائے بڑھانے کا مطالبہ کردیا
راولپنڈی: (اصغر علی مبارک) پٹرولیم مصنوعات کی قیمتوں میں اضافے کے بعد جڑواں شہروں کے ٹرانسپورٹرز نے کرایوں میں اضافے کا مطالبہ کردیا جبکہ ریجنل ٹرانسپورٹ اتھارٹی راولپنڈی نے زائد کرایوں کی وصولی پر سخت کارروائی کا لائحہ عمل تیار کر لیا۔ معلومات کے مطابق مرکزی ٹرانسپورٹ یونین راولپنڈی اسلام آباد نے پٹرولیم مصنوعات کی قیمتوں میں اضافہ کو مسترد کرتے ہوئے پٹرول کی قیمت میں اضافے کے تناسب سے نیا کرایہ نامہ جاری کرنے کا مطالبہ کیا ہے۔ ٹرانسپورٹرز نے کہا کہ پٹرول کی قیمت کے حساب سے کرایہ کم ہے اسے فوری طور پر بڑھایا جائے یا پیڑول کی قیمت کو کم کیا جائے۔
دوسری جانب سیکرٹری آر ٹی اے خالد یامین ستی نے ٹرانسپورٹرز کی جانب سے کرایوں میں ازخود اضافہ کے اعلان پر سخت کارروائی کا عندیہ دیتے ہوئے خبردار کیا کہ ٹرانسپورٹرز کو زائد کرایوں کی وصولی کسی صورت نہیں کرنے دیں گے اور اوور چارجنگ میں ملوث ٹرانسپورٹرز کے خلاف بھرپور کارروائی کی جائے گی۔ ذرائع نے بتایا کہ زائد کرایوں کی وصولی میں ملوث ٹرانسپورٹرز کے خلاف کارروائی کے لیے آر ٹی اے نے خصوصی سکواڈ بھی تشکیل دے دیئے ہیں جو کہ مسافروں کی شکایات پر فوری کارروائی کے ساتھ ساتھ ازخود بھی چھاپے ماریں گے۔ ذرائع نے بتایا کہ اوور چارجنگ میں ملوث ٹرانسپورٹرز کو بھاری جرمانوں کے ساتھ روٹ منسوخی کی سزائیں دی جا سکتی ہیں
