اسلام آباد: مشیر قومی سلامتی ناصر جنجوعہ کا کہنا ہے کہ امریکا کا بھارت کے ساتھ لاجسٹک اور میری ٹائم معاہدہ خطرے کی گھنٹی ہے جب کہ بھارت چین کو روکنے کی تیاریوں میں مصروف ہے۔

US Maritime agreements with India is a Treaty alarm, National Security Advisor

مشیر قومی سلامتی ناصر خان جنجوعہ نے بحر ہند میں پاکستان کو سیکیورٹی کے چیلنجز کے حوالے سے منعقدہ ایک روزہ قومی کانفرنس سے خطاب کرتے ہوئے کہا کہ قومی سلامتی کے تناظر میں میری ٹائم سیکیورٹی کا تصور اہمیت کا حامل ہے کیونکہ یہ دنیا بھر کے دریاوٴں اور سمندروں سے منسلک ہے اور اس کے اہم جز سمندر، گورننس اور سلامتی ہیں۔ ان کا کہنا تھا کہ سمندری سلامتی کئی جہتوں پر مشتمل ہے، یہ کسی صورت ایک محدود تصور نہیں، خطے میں امریکا کی 3 لاکھ 60 ہزار فوج موجود ہے اور بھارت چین کو روکنے کی تیاریوں میں مصروف ہے، پاکستان خطے کے دیگر ممالک کے لئے بیرونی دنیا تک رابطے کا گیٹ وے ہے۔ ناصر جنجوعہ کا کہنا تھا کہ اگر راحیل شریف سعودی فوجی اتحاد کے سربراہ بنتے ہیں تو وہ امت مسلمہ کے اتحاد کا سبب بنیں گے، جنرل ریٹائرڈ راحیل شریف اپنے تجربات اور سوچ کے ساتھ مسلم ممالک کی باہمی غلط فہمیوں کو دور کریں گے جس سے ایران سمیت اتحاد مخالف ممالک کو بھی فائدہ ہو گا۔ مشیر قومی سلامتی کا کہنا تھا کہ افغانستان میں پائیدار امن سے ہی روس اور وسطی ایشائی ریاستوں کو سی پیک سے فائدہ ہو گا، ہمیں ہر صورت افغانستان سے تعلقات بہتر بنانا ہوں گے، مشرقی اور مغربی محاذ میں سے مغربی محاذ کو بہتر تعلقات سے بند کرنا ہو گا، بھارت نے بھی دو محاذ کھول رکھے ہیں جو گھاٹے کا سودا ہے، بھارت کے دونوں محاذ ایٹمی طاقتوں کے خلاف ہیں۔