بہاولپور: مسلم لیگ (ق) کے وفاقی وزیر برائے ہاؤسنگ چودھری طارق بشیر چیمہ نے کہا ہے کہ جنوبی پنجاب صوبہ اور لوکل باڈی ایکٹ کے ایشوز پر ہم سے آج تک مشاورت نہیں کی گئی ہم تحریک انصاف کے اتحادی، بہاولپور صوبہ کے حمایتی ہیں، بہاولپور صوبہ پر حمایت لیں گے اور اگر اس ایشو پر حکومت چھوڑنی پڑی تو چھوڑ دیں گے۔

اپنی رہائش گاہ پر پریس کانفرنس سے خطاب کرتے ہوئے انہوں نے کہا کہ شاہ محمود قریشی کی یہ منطق سمجھ سے باہر ہے کہ تین اضلاع کا بہاولپور صوبہ نہیں بن سکتا، جنوبی پنجاب کے سیاست دان آنکھوں میں دھول نہ جھونکیں، بہاولپور صوبہ تھا، تاریخ کو مسخ نہیں کرنے دیں گے، عمران خان نے بہاول پور کے جلسہ میں صوبہ بحالی کا وعدہ کیا تھا۔ انہوں نے کہا کہ اگر جنوبی پنجاب کے سیاست دانوں کا کوئی وصف ہوتا تو یہ خطہ محروم نہ ہوتا۔ ہم نے جو بھی بات کرنی ہے عمران خان سے کرینگے ہماری توقعات بھی انہی سے ہیں۔ خطہ بہاولپورکے لوگ کسی جنوبی پنجاب صوبہ کا حصہ نہیں بننا چاہتے، خدارا ہمیں زبردستی جنوبی پنجاب میں شامل کرنے سے گریز کیا جائے۔ دوسری جانب مسلم لیگ کے سینئرمرکزی رہنما و سابق نائب وزیراعظم چودھری پرویزالٰہی نے کہا ہے کہ پاکستان مسلم لیگ اور پی ٹی آئی کے کارکن اپنے مشترکہ سیاسی دشمن کو پہچانیں اس کی سازشوں پر نظر رکھیں اور اس کی چالوں سے بچیں۔ وہ تلہ گنگ میں قومی اسمبلی کے حلقہ این اے 65 سے اپنے کاغذات نامزدگی کی منظوری کے بعد میڈیا اور وہاں بڑی تعداد میں موجود رہنماؤں و کارکنوں سے گفتگو کر رہے تھے۔ انہوں نے کہا کہ ہم نے تلہ گنگ کے عوام کی مثالی خدمت کی، یہاں کے عوام ہمارے لیے دعائیں کر رہے ہیں اور وہ انشاء اللہ ہمیں بھاری اکثریت سے کامیاب کرائیں گے کیونکہ ن لیگ نے تلہ گنگ میں بھی فرضی وعدوں اور جھوٹے دعوؤں کے سوا کچھ نہیں کیا، یہاں پر پاکستان مسلم لیگ اور پی ٹی آئی میں سیٹ ایڈجسٹمنٹ ہو گئی ہے، اللہ کے فضل اور عوام کی حمایت سے جیت ہماری ہوگی

ہم نے ماضی میں نہ صرف اس حلقہ بلکہ ضلع کی مثالی خدمت کی، تلہ گنگ سٹی ہسپتال، چکوال سے میانوالی اور اکوال سے شاہ محمد والی اور پنچند تک سڑکیں تعمیر کروائیں، انشاء اللہ کامیابی کے بعد قصبہ لاوہ کو گیس کی فراہمی کے علاوہ بلکسر سے میانوالی تک ون وے روڈ بھی بنوائیں گے۔ انہوں نے کہا کہ ماضی میں پورے ملک کی طرح تلہ گنگ میں بھی ہمارا الیکشن چرا کر میرے اس حلقہ کے عوام کے مینڈیٹ پر ڈاکہ ڈالا گیا، تلہ گنگ کو اپنا دوسرا گھر سمجھتا ہوں، حافظ عمار یاسر نے ہمیشہ اس علاقہ کے عام آدمی کا مقدمہ لڑا ہے، تمام دیگر پسماندہ اور غریب علاقوں کی طرح اس علاقہ کی ترقی، تعلیمی و طبی سہولتوں، گیس، بجلی کی فراہمی اور بیروزگاری و غربت کا خاتمہ ہمارا مشن ہے اور میری وزارتِ اعلیٰ کے دوران یہی ہماری پہلی ترجیح اور ویژن تھا جس کے باعث ہم نے عام اور غریب آدمی کی مثالی خدمت کی اور ریکارڈ فلاحی کام کیے۔ دوسری جانب مسلم لیگ کے مرکزی سیکرٹری جنرل و سابق ایم این اے طارق بشیر چیمہ کے کاغذات نامزدگی بہاولپور سے قومی اسمبلی کے حلقہ این اے 171 اور مونس الٰہی کے حلقہ این اے 172 سے کاغذات نامزدگی منظور ہو گئے ہیں۔