لاہور ؛ چیف جسٹس آف پاکستان جسٹس ثاقب نثار نے سب جیل قرار دئیے گئے ضیاءالدین ہسپتال میں چھاپہ مارا اور پاکستان پیپلز پارٹی کے رہنماءشرجیل میمن کے کمرے میں گئے تو وہاں سے شراب کی بوتلیں برآمد ہو گئیں جس پر خوب ہنگامہ برپا ہوا۔
آج شرجیل میمن کے خون کے نمونوں کی ٹیسٹ رپورٹ کیساتھ بوتلوں کی کیمیکل ایگزامینیشن رپورٹ بھی سامنے آ گئی ہے جس میں کہا گیا ہے کہ شرجیل میمن کے خون میں الکوحل کا سراغ ملا اور نہ ہی بوتلوں میں شراب تھی بلکہ ایک بوتل میں شہد اور دوسری بوتل میں زیتون کا تیل تھا۔ رپورٹس سامنے آنے کے بعد سوشل میڈیا پر ایک مرتبہ پھر تبصروں اور خبروں کا سلسلہ چل نکلا ہے اور معروف صحافی عصمت اللہ نیازی نے ایسی بات کہہ دی ہے کہ آپ کی بھی ہنسی نکل جائے گی۔
عصمت اللہ نیازی نے سماجی رابطوں کی ویب سائٹ ٹوئٹر پر جاری اپنے پیغام میں لکھا ”امین گنڈاپور سے بوتل نکلی کالے لیبل والی، پتہ چلا اس میں شہد تھا۔ شرجیل میمن کے کمرے سے بوتلیں نکلیں، پتہ چلا ایک میں شہد اور ایک میں زیتون کا تیل تھا۔ دونوں کی شکلوں سے نہیں لگتا کہ کبھی شہد یا زیتون کا تیل پیا ہو گا۔“
