لاڑکانہ (ویب ڈیسک) پاکستان پیپلز پارٹی کے سینئر رہنما نثار کھوڑو نے کہا ہے کہ وزیر اعلی کو گرفتار کیا گیا تو بھی مراد علی شاہ ہی وزیر اعلی رہیں گے۔ لاڑکانہ میں میڈیا سے گفتگو کرتے ہوئے سابق سپیکر سندھ  اسمبلی نثار کھوڑو نے کہا وزیر اعلی سندھ کی گرفتاری کی باتیں پھیلائیجا رہی ہیں، وہ گرفتار ہو کر بھی وزیر اعلی ہی رہیں گے، وزیر اعلی سندھ کی گرفتاری کی باتیں قبل از وقت ہیں، مراد علی شاہ سندھ کے وزیر اعلی ہیں اور رہیں گے۔ نثار کھوڑو نے وزیر اعظم عمران خان کی یو این جنرل اسمبلی میں تقریر کے حوالے سے کہا کہ انھوں نے کشمیریوں کے حق خود ارادیت سے متعلق گفتگو نہیں کی، عمران خان نے کہا تھا مودی آئے گا تو کشمیر کا مسئلہ حل ہو جائے گا۔ انھوں نے کہا کہ کراچی میں پی ٹی آئی اور ایم کیو ایم کا اتحاد ہی سندھ کو توڑنے کے لیے ہے۔ واضح رہے کہ کل وزیر اعلی سندھ مراد علی شاہ نے نیب کا سوال نامہ ملنے پر کہا تھا انھیں یہ سوالات پڑھ کر مزا آیا،میں آٹھ ماہ سے گرفتاری کی باتیں سن رہا ہوں، قید کا کوئی مسئلہ نہیں ہے۔انھوں نے کہا نامزدگی پارٹی کی جانب سے ہوتی ہے، جسے چاہے گی وہ وزیر اعلی ہوگا، پارٹی جو فیصلہ کرے گی قبول ہوگا، گرفتاری کے باوجود آغا سراج درانی، فریال تالپور اور دیگر اسمبلی کے رکن ہیں۔ انہوں نے کہا کہ حلیم عادل شیخ نے وزیراعلی سندھ کے لئے خطرے کے بیانات دے کر اپنے آپ کو فوکس میں رکھنے کی کوشش کی ہے اب ملک میں پی ٹی آئی کی کوئی اہمیت نہیں رہے ہے اور عوام پی ٹی آئی کی حکومت سے بے زار ہوچکے ہیں ہم احتساب کے عمل کو روکنے کے حامی نہیں مگر عمران خان کی عذاب حکومت سے عوام جان چھڑانا چاھتی ہے، انہوں نے کہا کہ پی ٹی آئی اور ایم کیو ایم کا اتحاد ہی سندھ کو توڑنے کے لئے ہے کیونکہ سندھ پر حملہ پاکستان پر حملہ ہے اگر اس سال کے آخر تک عمران خان کو گھر نہیں بھیجا گیا تو احتجاج کا رخ اسلام آباد اور پنڈی ہوگا جس میں پیپلز پارٹی کے ساتھ نوازلیگ۔ جے یو آئی اور دیگر جماعتیں بھی ساتھ ہونگی، انہوں نے کہا کہ سندھ میں پیپلز پارٹی کے 99 اراکین اسمبلی ہیں اب ضمنی انتخابات میں کامیابی سے 100 نشستیں ہوجائینگی، سندھ میں پیپلز پارٹی کی تیسری مرتبہ حکومت ہے اس لئے اب پی پی پی مخالفین کے جلنے کی بدبو اب سب محسوس کر رہے ہیں، انہوں نے کہا کہ 2007 سے 2018ع تک لاڑکانہ میں ترقی کی وجہ سے لاڑکانہ کا چھرا بدل چکا ہے جس وجہ سے شہر کی پراپرٹی کی قیمت کراچی کے مقابلے میں ہے، پیپلز پارٹی تنھا اڑان نہیں کرتی اس لئے سب کا تعاون چاہتی ہے۔