پیرس: 31 مئی:2018 فرانس کی دنیا کی سب سے بڑی سبزی، فروٹ اور تازہ اشیاء کی ہول سیل مارکیٹ نے پاکستان میں جدید ترین، انتہائی فعال اور کم قیمت مارکیٹ کھولنے کی خواہش کا اظہار کیا۔
اس پیشکش کا اظہار جناب بینوئٹ جیوسٹر ڈائریکٹر پراجیکٹ رنگیز نے جناب معین الحق سفیر پاکستان برائے فرانس کے غانزیزکے ایک حالیہ دورے کے دوران ہونے والی ایک ملاقات میں کیا جو کہ پیرس کے نواحی علاقے میں واقع ہے۔
سفیر پاکستان نے غانزیز کی جدید ترین سہولتوں سے لیس ہول سیل مارکیٹ کو پاکستان میں متعارف کروانے کا خیر مقدم کرتے ہوئے اسے ایک خوش آئند اقدام قرار دیا۔ سفیر پاکستان نے غانزیز مارکیٹ کے مختلف حصوں کا دورہ بھی کیا اور مارکیٹ میں موجود خوردنی اشیاء کی سٹوریج، انہیں محفوظ رکھنے کے نظام اور ان کی فرانس اور یورپ کے مختلف علاقوں میں ترسیل کے محفوظ ترین اور تیز ترین نظام میں گہری دلچسپی کا اظہار کیا۔
غانزیز کی انتظامیہ نے سفیر پاکستان کو پاکستان کی غذائی اشیاء کو غانزیز کی مارکیٹ میں متعارف کروانے کی بھی پیشکش کی۔ سفیر پاکستان اور غانزیز کی انتظامیہ نے جولائی میں غانزیز میں پاکستان کے مقبول آموں کی نمائش اور سردیوں میں پاکستانی کینوؤں کی نمائش کرنے پر اتفاق کیا۔
غانزیز مارکیٹ نے 1969 سے باقاعدہ طور پر کام شروع کیا اور وہ اب 234 ہیکڑز پر پھیلی ہوئی ہے یہ اشیاء کو محفوظ رکھنے کے نظام، تقسیم کاری نظام اور ذخیرہ کرنے کی سہولیات کے جدید ترین آلات سے لیس ہے۔ غانزیز کی سالانہ آمدن نو بلین یوروہے اور غانزیز فرانس اور یورپ کے دوسرے ممالک میں 6.64 ملین لوگوں کو کاروباری مواقعے فراہم کرتی ہے اور اس کے 1.258 ملین رجسٹرڈ خریدار ہیں۔
