گوجرانوالہ(ویب ڈیسک) ماہر فلکیات عبدالمنان اولیاء نے کہا ہے میاں نواز شریف کے زائچہ میں یکم جنوری 2019ء ستاروں کی چال کے مطابق خانہ دوم جو دھن ، دولت ، گلا ، آواز سے منسلک ہے میں برج قوس طلوع ہے ۔ اس خانے میں پہلے ہی دو بڑے ستارے سورج اور زحل موجود ہیں ، ستارہ عطار دخانہ دوم برج قوس میں داخل ہو کر سورج اور زحل کیساتھ میل کر یگا، اسی دن ستارہ زہرہ برج عقرب جو میاں نواز شریف کا برج ہے اس میں داخل ہو کر ستارہ مشتری کیساتھ میل کر یگا ، ستاروں کی یہ گرہ ، چال ، میل ملاپ نواز شریف کیلئے خاص وقت اتھل پتھل لانے والا ہو گا۔ اس کے علاوہ میاں نواز شریف کے زائچہ میں ستارہ مشتری 10اپریل 2019ء کو برج قوس میں وکری ہو کر 11اگست 2019ء کو اپنی بھر پور طاقت کیساتھ واپس برج عقرب میں مارگی ہو گا۔ برج عقرب پر ستارہ مشتری کی چال کے مطابق بر ج عقرب پر نیک دوستانہ محبت کی نظر کریگا جس سے میاں نواز شریف کو بہت زیادہ نیک پھل ملنے کے آثار بنتے نظر آرہے ہیں اوپر اور نیچے ستاروں کی ایسی عمدہ چال کو دیکھ کر لگتا ہے کسی بھی صورت میاں نواز شریف کی رہائی ممکن ہو جائیگی۔ یاد رہے کہ بدعنوانی کے الزامات کے تحت میاں نواز شریف کو سابق چیف جسٹس کے دور میں قید اور جرمانوں کی سزا سنائی گئی تھی ، جسکے بعد میاں نواز شریف کو کوٹ لکھپت جیل منتقل کر دیا گیا تھا ، تاہم چند روز قبل ہی عدالت نے بیماری اور علاج کی بنیادوں پر انکی ضمانت پر رہائی کی درخواست منظور کر لی اور اس وقت میاں نواز شریف 8 ہفتوں کے لیے ضمانت پر رہا ہیں ۔ بعض حلقے کہہ رہے ہیں کہ اب میاں نواز شریف کی مشکلات کا ابتدائی دور ختم ہو چکا ہے ۔