راولپنڈی (نامہ نگار ) رات گئے ٹارگٹ کلنگ کے واقعہ میں نوجوان صحافی کو گولیاں مار کر بے دردی سے قتل کر دیا گیا ۔تفصیلات کے مطابق نوجوان صحافی انجم منیر راجہ والد ممتاز حسین راجہ اپنی پیشہ وارانہ ذمہ داریوں کی ادائیگی کے بعد واپس گھر جا رہے تھے کہ تھانہ سول لائن کے علاقہ سروس روڈ پر نا معلوم موٹرسائیکل سواروں نے اس پر فائرنگ کر دی ایک گولی ان کے سر اور دو گولیاں ان کی چھاتی میں لگیں جس کے باعث وہ موقع پر ہی جان بحق ہوگئے ۔ مقتول کی نعش کو پوسٹمارٹم کے لیے ڈی ایچ کیو ہسپتال منتقل کر دیا گیا ہے۔ ادھر تھانہ سول لائن کی پولیس ٹیم نے بھی ضابطہ کی کارروائی شروع کردی ہے ۔ ٹارگٹ کلنگ کے اس واقعہ پر پریس کلب راولپنڈی کے ذمہ داران راجہ وحید جنجو عہ۔عابد عباسی۔ راولپنڈی یونین آف جرنلسٹس کے خان گلزار پی ایف یو جے دستور کے صدر شرجیل امجد راو ہارون کمال راجہ اور دیگر نے شدید ردعمل کا اظہار کرتے ہوئے سی پی او سے تحقیقات کے لئے اعلی سطح کی ٹیم بنانے کا مطالبہ کیا ہے جبکہ آج اس پر مزید لائحہ عمل طے کیا جائے گا ۔
