Zulfiqar Mirza

بدین : عدالت کی جانب سے دو مقدمات میں ضمانت کی منظوری اور پولیس کو سیکورٹی فراہم کرنے کی ہدایت کے بعد ذوالفقار مرزا بدین سے کراچی روانہ ہو گئے۔

سابق وزیر داخلہ سندھ کی اہلیہ اور دیگر ساتھی بھی ان کے ہمراہ ہیں ذوالفقار مرزا سجاول اور ٹھٹھہ کے راستے کراچی پہنچیں گے اور کل اپنے خلاف زیر سماعت مقدمات میں سندھ ہائی کورٹ میں پیش ہونگے۔ کراچی روانگی سے قبل میڈیا سے گفتگو کرتے ہوئے فہمیدہ مرزا نے کہا کہ ان کے شوہر کے خلاف ایف آئی آرز سیاسی بنیادوں پر درج کی گئیں۔

بہت سے کارکن ایسے ہیں جو واقعہ کے وقت موجود ہی نہیں تھے لیکن انہیں ملزم نامزد کر دیا گیا ایسا جمہوریت میں نہیں ڈکٹیٹر شپ میں ہوتا ہے۔ سابق اسپیکر نے راستے میں حملے کے خدشے کا بھی اظہار کیا۔ میڈیا نے ذوالفقار مرزا کو بھی گھیرا لیکن انہوں نے بات کرنے سے انکار کر دیا۔

ذوالفقار مرزا اور ان کے ساٹھ نامزد ساتھیوں کے خلاف تین روز قبل توڑ پھوڑ ، ہنگامہ آرائی اور دہشتگردی ایکٹ کے تحت مقدمات درج کئے گئے تھے جن میں سے چار کو گرفتار بھی کیا جا چکا ہے۔